हिमालयन पावरले असार एक गतेदेखी २१ करोडको आइपीओ जारी गर्ने, कस्तो छ कम्पनी ?

Loading...

हिमालयन पावर पार्टनर कम्पनी (HPPL) ले आगामी असार एक गतेदेखी सर्वसाधरणका लागि आईपीओ जारी गर्ने भएको छ । कम्पनीले एक सय रुपैयाँ अंकित दरले २१ करोड ३० लाख रुपैयाँ बराबरको २१ लाख ३० हजार ८३४ कित्ता आईपीओ जारी गर्ने भएको हो ।

यसअघि लमजुङका स्थानीय बासिन्दालाई १० लाख ६५ हजार ४१७ कित्ता (१० प्रतिशत) आइपीओ जारी गरेको कम्पनीले सर्वसाधरणका लागि आईपीओ जारी गरी बाँडफाँड समेत गरीसकेको छ । कम्पनीले सर्वसाधारणका लागि २० प्रतिशत सेयर बिक्री गर्न लागेको हो ।

२१ लाख ३० हजार ८३४ कित्ता सेयरमध्ये कम्पनीले ४२ हजार ६१७ कित्ता कम्पनीका कर्मचारी र एक लाख ६ हजार ५ सय ४२ कित्ता सामुहिक लगानीकोषका लागि छुट्याएको छ ।

कम्पनीको सेयर बिक्री प्रबन्धकमा ग्लोबल आईएमई क्यापिटल रहेको छ ।

कम्पनीको सेयरमा कम्तिमा ५० कित्तादेखि बढीमा दश हजार कित्तासम्मका लागि आवेदन दिन पाईनेछ । कम्पनीको सेयरमा असार १ गतेदेखि ५ गतेसम्म आवेदन गर्न पाइनेछ ।

कहाँ बाट गर्ने आवेदन ?

कम्पनीको साधारण सेयरमा ग्लोबल आइएमई क्यापिटल जमल, हिमालयन पावर पार्टनर लिमिटेड पानि पोखरी, ग्लोबल आईएमई बैंकका विभिन्न शाखा कार्यालयहरु लगायत आश्वा सेवा अनुमति प्राप्त सम्पूर्ण बैंक तथा वित्तीय संस्थाका सबै शाखा कार्यालय मार्फत आवेदन गर्न पाइनेछ ।

हाल कम्पनीको चुक्ता पूँजी ८५ करोड २३ लाख ३३ हजार रुपैयाँ रहेको छ । सर्वसाधारणलाई आईपीओ जारी गरेपछि कम्पनीको चुक्ता पुँजी एक अर्ब ६ करोड ५४ लाख रुपैयाँ पुग्नेछ भने संस्थापक सेयर समूहको सेयर हिस्सा ७० प्रतिशतमा सीमित हुनेछ ।

कस्तो छ हिमालयन पावर कम्पनी ?

हिमालयन पावर पार्टनर लिमिटेड २०६१ सालमा स्थापना गरिएको निजी क्षेत्रको कम्पनी हो । सन् २०१३ मा एनआरएनए इन्भेस्टमेन्ट लिमिटेडलाई पार्टनर कम्पनीको रूपमा समावेश गरेको यो कम्पनीले ०६८ असारमा विद्युत्त उत्पादन अनुमति पाएको थियो ।

कम्पनीले लमजुङको दोर्दी करिडोरमा २७ मेगावाटको जलविद्युत्त आयोजना निर्माण गर्देछ । गैरआवासीय नेपालीहरूले सामूहिक रूपमा लगानी गरेको दोर्दीखोला जलविद्युत्त आयोजना नेपालकै पहिलो हो ।
कुल ४ अर्ब २३ करोड ३५ लाख रुपैयाँ लगानीमा निर्माण थालिएको यो आयोजनामा ७५ प्रतिशत कर्जा र २५ प्रतिशत सेयर पुँजीबाट निर्माण गरिने भएको हो ।

कम्पनीमा गैर आवासीय नेपालीको संस्था एनआरएन इन्भेष्टमेन्ट कम्पनीको ५१ प्रतिशत, आइएमइ ग्रुप र वल्र्डवाइड इन्भेष्टमेन्टमा आवद्धहरुको कुल ९.९५ प्रतिशत, उषा इन्भेष्टमेन्ट प्रालीको ६.६४ प्रतिशत, हाथवे इन्भेष्टमेन्ट कम्पनीको ३.६३, बैंकर तथा व्यवसायी चन्द्रप्रसाद ढकालको १०.२९ प्रतिशत, उत्तम कुमार नेपालको ६.१२ प्रतिशत सेयर लगानी रहेको छ ।

प्रवद्र्धक कम्पनी हिमालयन झन्डै २ वर्षदेखि पूर्वाधार निर्माणमा जुटेको छ । कम्पनीको ०७४ मंसिरबाट व्यावसायिक विद्युत्त उत्पादन थाल्ने लक्ष्य छ ।

Loading...



Loading…