भोलीदेखि सरकारले लामो दुरीका सवारी चल्न नदिने

काठमाडौं ।    सरकारले भोलीदेखि लामो लामो दुरीका सवारी रोक्ने निर्णय गरेको छ । सरकारको यस निर्णयलाई सार्वजनिक यातायात केन्द्रिय महासंघ नेपालले स्वागत गरेको छ । महासंघले शनिवार काठमाडौंमा पत्रकार सम्मेलनको आयोजना गरि सरकारले लामो दुरीका सवारी रोक्ने निर्णय स्वागत योग्य भएको बताएको छ ।

महासंघका अध्यक्ष होमप्रसाद अधिकारीले नेपाल सरकारले कोरोना भाइरस आउन नदिन जुन किसिमका कामहरु गरेको त्यसको लागि महासंघले हातेमालो र सहयोग गर्ने बताउनुभयो । प्रधानमन्त्री केपी शर्मा ओलीले शुक्रवार राष्ट्रका नाममा जुन सम्वोधन गर्नुभएको छ त्यसमा पनि महासंघले स्वागत गरेको अध्यक्ष अधिकारीले बताउनुभयो । उहाँले कोरोनाको संक्रमण भित्रन नदिन भारतबाट भित्रने भारतीय नागरिक पनि पूर्ण रुपमा रोक्न सरकारलाई आग्रह गर्नुभयो ।

साथै अधिकारीले नेपाली सवारी साधनहरुलाई ज्वरो नाप्ने यन्त्र, मास्क जस्ता सामानहरु उपलव्ध गराईदिन समेत सरकारलाई आग्रह गर्नुभयो । सरकारले तोकेको भन्दा कुनै सवारीले धेरै भाडा लिएको पाइएमा कारवाहीको दायरामा ल्याउन महासंघले सहयोग गर्ने पनि प्रतिबद्धता व्यक्त गर्नुभयो । सम्बाद क्लबले कार्यक्रममा राष्ट्रिय उपभोक्ता मञ्चका अध्यक्ष प्रेमलाल महर्जनले भारतबाट नेपाल आउने सवारी साधनमा आउने मानिस भित्रता सरकारले प्रभावकारी रुपमा चेकजाँच गर्न नसकेको आरोप लगाउनुभयो ।

उहाँले भारबाट नेपाल आउने सुनौली नाकामा विहान ६ बजे देखि वेलुका ६बजे सम्म चेकजाँच भए पनि रातीको समयमा चेकजाँच गर्ने काममा लापरवाही भएको बताउनुभयो । साथै सरकारले सवै क्षेत्रको अनुगमनलाई प्रभावकारी रुपमा अगाडि बढाउन जरुरी रहेको बताउदै जनता पनि सजक हुन जरुरी रहेको महर्जनले बताउनुभयो । सरकारले भोली देखि उपत्यकाबाट बाहिर जाने र बाहिरबाट आउँने सवारी साधनलाई बन्द गर्ने भएको छ ।

–     गोरखापत्र दैनिक बाट